Hui Ek KHwab Se Shadi Meri Tanhai Ki

hui ek KHwab se shadi meri tanhai ki

pahli beTi hai udasi meri tanhai ki

abhi malum nahin kitne hain zati asbab

kitni wajhen hain samaji meri tanhai ki

ja ke dekha to khula raunaq-e-bazar ka raaz

ek ek chiz bani thi meri tanhai ki

shahr-dar-shahr jo ye anjumanen hain aabaad

tarbiyat-gahen hain sari meri tanhai ki

sirf aaina-e-aghosh-e-mohabbat mein mili

ek tanhai jawabi meri tanhai ki

saf hai chehra-e-qatil meri aankhon mein magar

mo'atabar kab hai gawahi meri tanhai ki

hasil-e-wasl sifar hijr ka hasil bhi sifar

jaane kaisi hai riyazi meri tanhai ki

kisi haalat mein bhi tanha nahin hone deti

hai yahi ek KHarabi meri tanhai ki

main jo yun phirta hun mai-KHanon mein but-KHanon mein

hai yahi roza namazi meri tanhai ki

'farhat-ehsas' wo ham-zad hai mera jis ne

shahr mein dhum macha di meri tanhai ki

(1083) Peoples Rate This

Your Thoughts and Comments

Hui Ek KHwab Se Shadi Meri Tanhai Ki In English By Famous Poet Farhat Ehsas. Hui Ek KHwab Se Shadi Meri Tanhai Ki is written by Farhat Ehsas. Read famous Poem Hui Ek KHwab Se Shadi Meri Tanhai Ki for youth and Student by Farhat Ehsas. Free Download Hui Ek KHwab Se Shadi Meri Tanhai Ki in PDF.