KHuda Kare Ki Ye MiTTi Bikhar Bhi Jae Ab

KHuda kare ki ye miTTi bikhar bhi jae ab

chaDha hua hai jo dariya utar bhi jae ab

ye rose rose ka milna bichhaDna khalta hai

wo meri ruh ke andar utar bhi jae ab

wahan wo phul sa chehra hai muntazar us ka

kaho ye shair-e-awara ghar bhi jae ab

main apne-ap ko kab tak yunhi sameTe phirun

chale wo aandhi ki sab kuchh bikhar bhi jae ab

usi ki wajh se sare wabaal hain 'faruq'

badan ka qarz ada ho ye sar bhi jae ab