Mashwara Kis Ne Diya Tha Ki Masihai Kar

mashwara kis ne diya tha ki masihai kar

zaKHm khane hain to logon se shanasai kar

jeb KHali hai to kya dil se duaen denge

hum se durweshon ki nadan pazirai kar

phir nazar aaegi aasan ye duniya tujh ko

aankh se dekh magar dil ko tamashai kar

ghar mein mumkin hai magar dil mein na diwar uTha

faisla soch-samajh kar ye mere bhai kar

dudh ka dudh bhi aur pani ka pani hoga

ru-ba-ru baiTh ke baaten kabhi harjai kar

kaun deta hai yahan dad-e-suKHan ab 'faruq'

kyun jalata hai lahu qafiya-paimai kar