Qurbaten BaDh Gai Nigahon Ki

qurbaten baDh gai nigahon ki

ab haden KHatm hain libason ki

dhup roke khaDi hai kis ke liye

ye sar-e-rah qatar peDon ki

aur phailega aag ka dariya

aur jhulsegi khaal chehron ki

KHud-kushi ka safar bhi sahl nahin

bhiD si hai lagi sawalon ki

kaun KHud mein samo saka hai kabhi

wusaten la-zawal lamhon ki

kab se dohra raha hun main 'muztar'

ek fahrist chand namon ki