Saf-e-matam Pe Jo Hum Nachne Gane Lag Jaen

saf-e-matam pe jo hum nachne gane lag jaen

gardish-e-waqt! tere hosh Thikane lag jaen

wo to wo us ki maiyat mein guzara hua pal

jo bhulaen to bhulane mein zamane lag jaen

mere qadir! jo tu chahe to ye mumkin ho jae

raftagan shahr-e-adam se yahan aane lag jaen

bazm-e-duniya se chalun aisa na ho sab mere yar

ek ek kar ke mujhe chhoD ke jaane lag jaen

KHwahish-e-wasl! tera kya ho jo hum sal-ba-sal

ashra-e-soz gham-e-hijr manane lag jaen

hum samajh pae na 'fartash' mizaj-e-KHuban

dil churaen to kabhi aankhen churane lag jaen