Hijrat

wo aaghosh jis mein pale

aur pal kar jawan hum hue hain

use chhoDne ki tadabir karne mein masruf aise hue hain

ki zindan se qaidi rihai ki rahon ki

tamir karne mein mashghul hote hain jaise

wo aaghosh jis mein jawan hum hue hain

use chhoD kar dur jaane ke ehsas se

jo KHushi mil rahi hai

kisi bhi tarah is se kamtar nahin hai

jo zindan se bahar nikalne mein mahsus hoti hai zindaniyon ko

KHush ka ye ehsas

aisa nahin ki faqat ek hum tak hi mahdud ho

ye KHushi ghar ke diwar-o-dar mein bhi ghar kar gai hai

man bahan bap bhai bhi gardan uThae hue

apne ham-sayon se kahte phirte nazar aa rahe hain

ki mera qamar bhi arab ja raha hai

sharik-e-safar ki ragon mein bhi KHushiyan uchhalne lagi hain

wo raaton ki sab lazzaten bhul kar

jaane wale ki taiyariyon mein

baDe chaw se munhamik ho gai hai

ajab jaan-fiza hai ye hijrat ka manzar

magar ye riwayat hai

makke se yasrib ko jate hue

mustafa aur sare sahabi bahut ro rahe the

watan ki mohabbat inhen rokti thi

judai jigar mein tabar bhaunkti thi

wo hijrat ka manzar baDa jaan-gusil tha

magar aaj hijrat ka manzar badal sa gaya hai

ye manzar to sach-much baDa jaan-fiza hai

magar aisa kyun hua hai

yahan to mazalim ki wo saKHtiyan bhi nahin hain

(897) Peoples Rate This

Your Thoughts and Comments

Hijrat In English By Famous Poet Ghazanfar. Hijrat is written by Ghazanfar. Read famous Poem Hijrat for youth and Student by Ghazanfar. Free Download Hijrat in PDF.