Dhul Na Banna Aainon Par Bar Na Hona

dhul na banna aainon par bar na hona

binai ke raste ki diwar na hona

shahron ka wirsa hain jalte-bujhte manzar

rahna lekin ham-rang-e-bazar na hona

zahr-hawaen purwa rangon mein chalti hain

sada kaliyo un ke liye gulnar na hona

milne ka khilne ka mausam dur nahin hai

naKHl-e-matam ai mere ashjar na hona

main ne chaman ki KHatir kaun se dukh jhele hain

shaKH-e-bahaaran mere liye gul-bar na hona