Wahi Haalat Hain Faqiron Ke

wahi haalat hain faqiron ke

din phire hain faqat waziron ke

apna halqa hai halqa-e-zanjir

aur halqe hain sab amiron ke

har bilawal hai des ka maqruz

panw nange hain benaziron ke

wahi ahl-e-wafa ki surat-e-haal

ware nyare hain be-zamiron ke

sazishen hain wahi KHilaf-e-awam

mashware hain wahi mushiron ke

beDiyan samraj ki hain wahi

wahi din-raat hain asiron ke