Dekh Kar Shama Ke Aaghosh Mein Parwane Ko
dekh kar shama ke aaghosh mein parwane ko
dil ne bhi chheD diya shauq ke afsane ko
zarre zarre se gulistan mein barasti hai bahaar
kaun aise mein sambhaale tere diwane ko
tur ne jis se hayat-e-abadi pai hai
lao dohraun main phir se isi afsane ko
dil-e-sarshaar mera chashm-e-siyah-mast teri
jazba Takra de na paimane se paimane ko
subh ko dekh le is shama ka anjam koi
jis ne phunka shab-e-ummid mein parwane ko
Hadi Machlishahri 
(862) Peoples Rate This