Tez Jab KHanjar-e-bedad Kiya Jaega

tez jab KHanjar-e-bedad kiya jaega

hum gharibon ka gala yaad kiya jaega

ghair ko KHush hamein nashad kiya jaega

kab talak ye sitam ijad kiya jaega

ye to batlao hamein shahr basane walo

dil ka virana kab aabaad kiya jaega

aur kya hoga tere ahd-e-sitam mein ai dost

roz taza sitam ijad kiya jaega

ye jahan murda-paraston ka jahan hai yaro

hum na honge to hamein yaad kiya jaega

dast-o-bazu se bhi kuchh kaam liya jae 'hafiz'

ta-ba-kai shikwa-e-sayyaad kiya jaega