Wo To BaiThe Rahe Sar Jhukae Hue
wo to baiThe rahe sar jhukae hue
jadu un ki nigahon ke chalte rahe
mushkilon ne bahut rah roki magar
jin ko manzil ki dhun thi wo chalte rahe
main unhen bhi gale se lagata raha
mere bare mein jo zahr ugalte rahe
hum to qaem rahe apni har baat par
tum ba-rang-e-zamana badalte rahe
yaad ke jugnuon se wo aalam raha
dip bujhte rahe dip jalte rahe
hum ne daman na apna bhigoya 'hafiz'
dil mein tufan lakhon machalte rahe
Hafeez Banarasi 
(930) Peoples Rate This