Mohabbat Karne Wale Kam Na Honge

mohabbat karne wale kam na honge

teri mahfil mein lekin hum na honge

main aksar sochta hun phul kab tak

sharik-e-girya-e-shabnam na honge

zara der-ashna chashm-e-karam hai

sitam hi ishq mein paiham na honge

dilon ki uljhanen baDhti rahengi

agar kuchh mashware baham na honge

zamane bhar ke gham ya ek tera gham

ye gham hoga to kitne gham na honge

kahun bedard kyun ahl-e-jahan ko

wo mere haal se mahram na honge

hamare dil mein sail-e-girya hoga

agar ba-dida-e-pur-nam na honge

agar tu ittifaqan mil bhi jae

teri furqat ke sadme kam na honge

'hafiz' un se main jitna bad-guman hun

wo mujh se us qadar barham na honge