Ishq Ne Aql Ko Diwana Bana Rakkha Hai

ishq ne aql ko diwana bana rakkha hai

zulf-e-anjam ki uljhan mein phansa rakkha hai

uTh ke baalin se mere dafn ki tadbir karo

nabz kya dekhte ho nabz mein kya rakkha hai

meri qismat ke nawishte ko miTa de koi

mujh ko qismat ke nawishte ne miTa rakkha hai

aap betab-e-numaish na karen jalwon ko

hum ne didar qayamat pe uTha rakkha hai

wo na aae na sahi maut to aaegi 'hafiz'

sabr kar sabr tera kaam hua rakkha hai