Yar Ko Maine Mujhe Yar Ne Sone Na Diya

yar ko main ne mujhe yar ne sone na diya

raat bhar tala-e-bedar ne sone na diya

KHak par sang-e-dar-e-yar ne sone na diya

dhup mein saya-e-diwar ne sone na diya

sham se wasl ki shab aankh na jhapki ta-subh

shadi-e-daulat-e-didar ne sone na diya

ek shab bulbul-e-betab ke jage na nasib

pahlu-e-gul mein kabhi KHar ne sone na diya

jab lagi aankh karaha ye ki bad-KHwab kiya

nind bhar kar dil-e-bimar ne sone na diya

dard-e-sar sham se us zulf ke saude mein raha

subh tak mujh ko shab-e-tar ne sone na diya

raat bhar kin dil-e-betab ne baaten mujh se

ranj o mehnat ke giraftar ne sone na diya

sail-e-girya se meri nind uDi mardum ki

fikr-e-baam-o-dar-o-diwar ne sone na diya

bagh-e-alam mein rahin KHwab ki mushtaq aankhen

garmi-e-atish-e-gulzar ne sone na diya

sach hai gham-KHwari-e-bimar azab-e-jaan hai

ta-dam-e-marg dil-e-zar ne sone na diya

takiya tak pahlu mein us gul ne na rakkha 'atish'

ghair ko sath kabhi yar ne sone na diya