Milta Hai Har Charagh Ko Saya Zamin Par
milta hai har charagh ko saya zamin par
rahta nahin hai koi akela zamin par
har ek naqsh us ka hawa le ke uD gai
khincha tha hum ne shauq ka naqsha zamin par
badle hue se lagte hain ab mausamon ke rang
paDta hai aasman ka saya zamin par
gosha zara sa koi aman ka kahin mile
ji tang ho gaya hai kushada zamin par
har ek mauj ruk si gai sans ki tarah
bahta nahin hai ab kahin dariya zamin par
wo jin ko mere ghar ka nishan bhi nahin mila
hairan hain mujh ko dekh ke zinda zamin par
Hamdam Kashmiri 
(886) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544