Chalo Wapas Chalen

tumhein KHwahish ko chhune ki tamanna hai

KHwahishen to uDti-phirti titliyan hain

Dak ki nakara Ticketen to nahin hain

jinhen album mein rakh kar tum ye samjho

ki ye nayab chizen ab tumhaari dastaras mein hain

tumhein sapne pakaDne ki tamanna hai

nahin ye ghair-mumkin hai

ki sapne an-chhue lamhon ke nazuk aks hain

aaraishi belen nahin

jo kamre ki kisi diwar par saj kar

tumhaari did ka ehsan uThaen

tumhein kohre ke bhige phul chunne ki tamanna hai

ye kohra to charagh-e-mausam-e-gul ka dhuan hai

koi diwar-e-berlin par khinchi tahrir ya naqsha nahin

jise jis waqt jo chahe badal de

ya miTa de

sabz-ru kohra pakaDna is qadar aasan nahin

suno

diwangi chhoDo

chalo wapas haqiqat mein chalen