Chehre Pe Mohr-e-gham Hai KHat-o-Khaal Ki Tarah

chehre pe mohr-e-gham hai KHat-o-KHal ki tarah

mazi bhi dam ke sath hai ab haal ki tarah

patte the KHak-bos to shaKHen thin sar-nigun

kunj-e-chaman bhi tha dil-e-pamal ki tarah

apne haruf-e-shauq jo shoala-ba-jaan the kal

ThanDe paDe hain aaj wo aqwal ki tarah

tahzib hai ki aae to hans bol kar gae

chupke se jaiye na mah-o-sal ki tarah

sab ke sitare dekh ke dil ne salah di

gardish mein kyun paDo kisi rummal ki tarah

aanchal mein nind bandh ke ai raat aa bhi ja

ye din laga hai jaan ko janjal ki tarah

rakhiye chhupa ke apna dafina hasan-'naim'

gham ko luTaiye na zar-o-mal ki tarah