Tashwish

mujh ko tashwish hai kuchh roz se mere mahbub

mere andaz-e-tafakkur ki ye pur-KHar rawish

teri hassas tabiat ko na kar de majruh

aur tu samjhe ki nahin tujh mein wo pahli si kashish

ab bhi jalwon mein hai taKHliq-e-mohabbat ki sakat

teri baaton mein abhi tak hai fusun ka andaz

aariz o lab pe tabassum ka KHiram-e-madhosh

ab bhi deta hai taKHayyul ko payam-e-parwaz

phir bhi ehsas-e-masarrat ka na ho zehn ko hosh

gin to sakta hun, shab-e-hijr mein taron ko magar

zehn aawara KHayalat se bhar jata hai

ashk-e-majbur bahaun gham-e-jaanan mein magar

silsila mere in ashkon ka bikhar jata hai

mujh ko tashwish hai kuchh roz se mere mahbub

mere andaz-e-takallum ki ye begana-rawi

teri hassas tabiat ko na kar de majruh

aur taskin na ho phir husn-e-KHud-ara ko kabhi

(518) Peoples Rate This

Your Thoughts and Comments

Tashwish In English By Famous Poet Hasan Nayeem. Tashwish is written by Hasan Nayeem. Read famous Poem Tashwish for youth and Student by Hasan Nayeem. Free Download Tashwish in PDF.