Nala-e-gham Shoala-asar Chahiye
nala-e-gham shoala-asar chahiye
chaak-e-dil ab ta-ba-jigar chahiye
kitne mah-o-najm hue nazr-e-shab
ai gham-e-dil ab to sahar chahiye
manzilen hain zer-e-kaf-e-pa magar
ek zara azm-e-safar chahiye
aaina-KHane mein hai darkar kya
chahiye ek sang agar chahiye
dur hai dil manzil-e-gham se hanuz
ek ghalat andaz-e-nazar chahiye
tishnagi-e-lab ka taqaza hai ab
baada ho ya zahr magar chahiye
Himayat Ali Shayar 
(745) Peoples Rate This