Ye Bastiyan Hain Ki Maqtal Dua Kiye Jaen
ye bastiyan hain ki maqtal dua kiye jaen
dua ke din hain musalsal dua kiye jaen
koi fughan koi nala koi buka koi bain
khulega bab-e-muqaffal dua kiye jaen
ye iztirab ye lamba safar ye tanhai
ye raat aur ye jangal dua kiye jaen
bahaal ho ke rahegi faza-e-KHitta-e-KHair
ye habs hoga moattal dua kiye jaen
guzishtagan-e-mohabbat ke KHwab ki saugand
wo KHwab hoga mukammal dua kiye jaen
hawae sarkash o saffak ke muqabil bhi
ye dil bujhenge na mishal dua kiye jaen
ghubar uDati jhulasti hui zaminon par
umanD ke aaenge baadal dua kiye jaen
qubul hona muqaddar hai harf-e-KHalis ka
har ek aan har ek pal dua kiye jaen
Iftikhar Arif 
(1422) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544