Ye Jo Tartib Se Bana Hua Main

ye jo tartib se bana hua main

ek muddat mein rasta hua main

log aate the dekhne mujh ko

aise patthar se aaina hua main

kya KHabar kab nazar mein aa jaun

shor mein ek bolta hua main

ab to pahchan mein nahin aata

teri diwar se juDa hua main

shahr ke bich aa gaya ek din

sahn ke bich dauDta hua main

aap bhi apna shauq farmaen

jaane kitnon ka hun Dasa hua main

sham hoti hai to nikalta hun

us ki palkon se chiKHta hua main