Aadmi

la-intiha jahan-e-mujassam se bhi siwa

la-muntaha zamanon mein rahte hue ye abad

qarnon se rengti hui taqwim-e-kaenat

aab-o-gil-o-shuur sar-e-do-jahan adam

la-falsafa nihayat-e-fahm-e-payambari

zauq-e-numu ki hath mein rekhaen dam-ba-dam

kya jaaniye ki kitne baras ka hai ye charagh

tahzib-e-soKHta hai ayagh-e-huruf mein

fikr o KHirad ki bahr o talatum mein kashtiyan

ubhrin kahin to rizq-e-samundar kahin huin

is ehtimam-e-KHwab-e-tahayyur mein main nazhad

tanha khaDa hun apni numaish ke waste

main bhiD ke nawah mein madum aadmi