Kaif-e-hayat Tere Siwa Kuchh Nahin Raha

kaif-e-hayat tere siwa kuchh nahin raha

teri qasam hai tujh se juda kuchh nahin raha

wallah sab ruten hain pareshan tere baghair

wallah mausamon ka maza kuchh nahin raha

tufan sahilon ko uDate chale gae

kaise kahun ki kuchh bhi raha kuchh nahin raha

afsos mabadon mein KHuda bechte hain log

ab mani-e-saza-o-jaza kuchh nahin raha

hum mai-kashon pe kufr ke fatwe diye gae

ahl-e-KHuda ko KHauf-e-KHuda kuchh nahin raha

hum to wafa-parast rahenge tamam umr

mana ki un ko pas-e-wafa kuchh nahin raha

'kaifi' main kis tarah se wo manzar bayan karun

main ne jo ro ke un se kaha kuchh nahin raha

(779) Peoples Rate This

Your Thoughts and Comments

Kaif-e-hayat Tere Siwa Kuchh Nahin Raha In English By Famous Poet Iqbal Kaifi. Kaif-e-hayat Tere Siwa Kuchh Nahin Raha is written by Iqbal Kaifi. Read famous Poem Kaif-e-hayat Tere Siwa Kuchh Nahin Raha for youth and Student by Iqbal Kaifi. Free Download Kaif-e-hayat Tere Siwa Kuchh Nahin Raha in PDF.