Aankhon Ke Charagh Warte Hain

aankhon ke charagh warte hain

aa teri nazar utarte hain

chullu bhar KHun bhik mil jae

hum kasa-e-sar pasarte hain

rakhte nahin sada safha-e-dil

naKHun ke naqsh ubhaarte hain

har raat difa-e-shahr-e-jaan ko

haari hui fauj utarte hain

mehnat se basa diya hai sahra

ab ghar ki taraf sidhaarte hain

bante hain lakiren kali nili

kaghaz ki jabin singhaarte hain

rota hai koi kisi ke gham mein

sab apne hi dukh bichaarte hain

jaisi ki guzar rahi hai 'KHusraw'

kuchh is se alag guzarte hain