Lafzon Ki Tijarat

wasia jangal hai ek jaanib pahaDon ka silsila chala hai

sham aahistagi se peDon pe kuhniyan Tekti hai

suraj kiran kiran apni raushni rehn rakh ke gharbi dayar-e-falaki se

baadalon ka lihaf le kar

yak-shabi nind ke tasawwur mein unghta hai

KHizan-rasida anar ka ek shajar khaDa hai

main jis ke niche

ahd-o-paiman ke lal yaqut

izhaar o iqrar ke zamurrad

kisi ko deta hun

aur leta hun

aur lafzon ki is tijarat pe

apni nind mein muskura raha hun