Jo Teri Afshan Sanwaren Zindagi Ai Zindagi
jo teri afshan sanwaren zindagi ai zindagi
roz-o-shab aise guzaren zindagi ai zindagi
baDh gaya dariya ka pani kaf uData mauj mauj
uD gain kokhon ki Daren zindagi ai zindagi
har taraf chhaya hua hai ek sukut-e-bekaran
phir bhi hum tujh ko pukaren zindagi ai zindagi
teri surat par guman-e-dasht-o-sahra hae hae
tere qadmon mein bahaaren zindagi ai zindagi
sar uThaen dar par ya den sar-e-maqtal sada
naqsh tere hi ubhaaren zindagi ai zindagi
jin ke honTon par sada rahte hain tere zamzame
un ke sinon mein kaTaren zindagi ai zindagi
shahr hai aaKHir ye koi sard virana nahin
jine wale dam na maren zindagi ai zindagi
den jo tujh ko fursat-e-yak-do-nafas ki tohmaten
un se bhi hum log haaren zindagi ai zindagi
dur tak milta na ho nam-o-nishan tera jahan
hum wahan daman pasaren zindagi ai zindagi
Jaleel Hashmi 
(811) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544