Be-hunar Saaton Mein Ek Sawal

nuzul-e-kashf ki rah mein safed darwaze

qadam-burida-musafir se puchhte hi rahe

tere safar mein to ujle dinon ki barish thi

teri nigahon mein KHufta dhanak ne karwaT li

bala ki nind mein bhi hath jagte the tere

tamam pahlu masafat ke samne the tere

teri gawahi pe to phul phalne lagte the

tere hi sath wo manzar bhi chalne lagte the

Thahar gae the jo baam-e-zawal par ek din

hanse the khul ke jo ahd-e-kamal par ek din

tere junun pe qayamat guzar gai kaise

riyazaton ki wo rut be-samar gai kaise