Badlegi Kaenat Meri Baat Man Lo

badlegi kaenat meri baat man lo

mujh se milao hat meri baat man lo

hum se qadam mila ke chaloge to dekhna

sar honge shash-jahat meri baat man lo

bigDi hui jo baat baDi muddaton se hai

ban jaegi wo baat meri baat man lo

hai zindagi baghair tumhaare ek iztirab

de do ise sabaat meri baat man lo

kis ne kaha hai tum se ki ta-umr sath do

hai chaar din ki baat meri baat man lo

pina paDe kahin na tumhein bhi meri tarah

talKHaba-e-hayat meri baat man lo

main jaanta hun meri tarah chahti ho tum

tanhai se najat meri baat man lo