KHud Apni Zat Ka Nam-o-nishan Bhul Gae

KHud apni zat ka nam-o-nishan bhul gae

riha hue to parinde uDan bhul gae

is inhimak se kar-e-zamin mein mahw hue

zamin pe chhaya hua aasman bhul gae

har imtihan mein pahla sabaq to yaad aaya

kitab-e-ishq kahin darmiyan bhul gae

na Thaharna hi munasib na uTh ke jaana hi

bala ke ghar mein hamein mezban bhul gae

us ajnabi ki rifaqat mein aisi KHushbu thi

hum apne sare safar ki thakan bhul gae

na kar numud ki KHwahish ki ye jahan wale

baDe-baDon ka bhi nam-o-nishan bhul gae

kuchh is tarah gham-e-umr-e-rawan ne KHak kiya

firaq-o-wasl ki sab dastan bhul gae