Ek Ajib Rag Hai Ek Ajib Guftugu
ek ajib rag hai ek ajib guftugu
sat suron ki aag hai aaThwin sur ki justuju
bujhte hue mere KHayal jin mein hazar-ha sawal
phir se bhaDak ke ruh mein phail gae hain chaar-su
tira-shabi pe sabr tha so wo kisi ko bha gaya
aap hi aap chha gaya ek sahab-e-rang-o-bu
hansti hui gai hai subh pyar se aa rahi hai sham
teri shabih ban gai waqt ki gard hu-ba-hu
phir ye tamam silsila kya hai kidhar ko jaega
meri talash dar-ba-dar tera gurez ku-ba-ku
KHun-e-junun to jal gaya shauq kidhar nikal gaya
sust hain dil ki dhaDkanen tez hai nabz-e-arzu
tera mera qusur kya ye to hai jabr-e-irtiqa
bas wo jo rabt ho gaya aap hi pa gaya numu
main jo raha hun be-suKHan ye bhi hai ehtiram-e-fan
yani mujhe aziz thi apni ghazal ki aabru
Jameeluddin Aali 
(795) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544