Aaj Kuchh Kahne Ko Thi ShoKHi-e-tadbir Meri

aaj kuchh kahne ko thi shoKHi-e-tadbir meri

hans paDi pas khaDi thi kahin taqdir meri

TuTte hi se hui dil mein kashakash paida

meri taKHrib mein poshida thi tamir meri

hurriyat zulmat-e-zindan mein janam leti hai

inqilabaat ki tariKH hai zanjir meri

apni jaanib kabhi dekha hi nahin tha warna

wusaten donon jahanon ki hain jagir meri

dosti kaisi rah-o-rasm-e-umumi bhi gai

pyar ki baat kahi aap se taqsir meri

main kahan aap kahan did ki ummid kahan

yaad aaun jo kabhi dekhiye taswir meri

ibrat-amoz hai duniya ka taghayyur 'jami'

mujh se milti nahin do roz ki taswir meri