Murajat

sham ho

aam si sham ho

jis ki had-bandiyon mein qafas bhi hon aur aashiyan bhi

hawaon ki aahaT pe khulte dariche bhi hon

aainon mein ghire nanhe munne parindon ka raqs-e-dam-e-wapsin

har nafas par-ba-par yurish-e-raegan bhi

aam si sham ho

lekin is sham ke raste mere ghar ja ruken

ghar ki dahliz par

meri man

muskuraate hue mere giryan dinon ki thakan chum le

sham ki sarhadon se muazzin pukare to

sab bhai bahnon ki chup mein meri chup bhi ho

sham ki sej par bap ke jism se mere bazu ugen

jab munDeron pe rakkhe diye jagmagane lagen

TuTte farsh par mera bhi aks ho

mera bhi nam ho

aam si sham ho

sham si sham ho