Hamare Dil Mein Ab TalKHi Nahin Hai
hamare dil mein ab talKHi nahin hai
magar wo baat pahle si nahin hai
mujhe mayus bhi karti nahin hai
yahi aadat teri achchhi nahin hai
bahut se faede hain maslahat mein
magar dil ki to ye marzi nahin hai
har ek ki dastan sunte hain jaise
kabhi hum ne mohabbat ki nahin hai
hai ek darwaze bin diwar-e-duniya
mafar gham se yahan koi nahin hai
Javed Akhtar 
(1585) Peoples Rate This