Jo Tufanon Mein Palte Ja Rahe Hain
jo tufanon mein palte ja rahe hain
wahi duniya badalte ja rahe hain
nikharta aa raha hai rang-e-gulshan
KHas o KHashak jalte ja rahe hain
wahin main KHak uDti dekhta hun
jahan chashme ubalte ja rahe hain
charagh-e-dair-o-kaba allah allah
hawa ki zid pe jalte ja rahe hain
shabab o husn mein bahas aa paDi hai
nae pahlu nikalte ja rahe hain
Jigar Moradabadi 
(1437) Peoples Rate This