Kisi Surat Numud-e-soz-e-pinhani Nahin Jati

kisi surat numud-e-soz-e-pinhani nahin jati

bujha jata hai dil chehre ki tabani nahin jati

nahin jati kahan tak fikr-e-insani nahin jati

magar apni haqiqat aap pahchani nahin jati

nigahon ko KHizan-na-ashna banna to aa jae

chaman jab tak chaman hai jalwa-samani nahin jati

pashiman-e-sitam wo dil hi dil mein rahte hain lekin

KHusha husne ki tarz-e-na-pashimani nahin jati

mizaj-e-ahl-e-dil be-kaif-o-masti rah nahin sakta

ki jaise nikhat-e-gul se pareshani nahin jati

sadaqat ho to dil sinon se khinchne lagte hain waiz

haqiqat KHud ko manwa leti hai mani nahin jati

bulandi chahiye insan ki fitrat mein poshida

koi ho bhes lekin shan-e-sultani nahin jati

gae wo din ki dil sarmaya-dar-e-dard-e-paiham tha

magar aankhon ki ab tak mir-samani nahin jati

jise raunaq tere qadmon ne de kar chhin li raunaq

wo lakh aabaad ho us ghar ki virani nahin jati

wo yun dil se guzarte hain ki aahaT tak nahin hoti

wo yun aawaz dete hain ki pahchani nahin jati

mujhe to kar diya sairab saqi ne mere lekin

meri sairabiyon ki tishna-samani nahin jati

nahin malum kis aalam mein husn-e-yar dekha tha

koi aalam ho lekin dil ki hairani nahin jati

jale jate hain baDh baDh kar miTe jate hain gir gir kar

huzur-e-shama parwanon ki nadani nahin jati

mohabbat mein ek aisa waqt bhi dil par guzarta hai

ki aansu KHushk ho jate hain tughyani nahin jati

'jigar' wo bhi ze-sar-ta-pa mohabbat hi mohabbat hain

magar un ki mohabbat saf pahchani nahin jati

(1388) Peoples Rate This

Your Thoughts and Comments

Kisi Surat Numud-e-soz-e-pinhani Nahin Jati In English By Famous Poet Jigar Moradabadi. Kisi Surat Numud-e-soz-e-pinhani Nahin Jati is written by Jigar Moradabadi. Read famous Poem Kisi Surat Numud-e-soz-e-pinhani Nahin Jati for youth and Student by Jigar Moradabadi. Free Download Kisi Surat Numud-e-soz-e-pinhani Nahin Jati in PDF.