GhaTa Chhai To Kya

chhaT gae jab aap hi udi ghaTa chhai to kya

turbat-e-pamal ke sabze pe lahar aai to kya

jab zarurat hi rahi baqi na lahn-o-rang ki

koyalen kukin to kya sawan ki rut aai to kya

hijr ke aalam se jab chhuT chuki nabz-e-nashat

ab hawa ne KHar-o-KHas mein ruh dauDai to kya

ho chuki zauq-e-tabassum hi se jab beganagi

ab chaman-afroz phulon ko hansi aai to kya

muD chuki jab maut ke jade ki jaanib zindagi

ab kisi ne aafiyat ki rah dikhlai to kya

har nafas ke sath dil se jab dhuan uThne laga

baadalon se chhan ke ab ThanDi hawa aai to kya

samne jab aap ke gesu ki lahren hi nahin

badliyon ne charKH par ab zulf bikhrai to kya

ho chuka payab jab bahr-e-sar-o-barg-e-shabab

ab samundar ki jawani baDh par aai to kya

ghuncha-e-ahd-e-tarab hi mil chuka ab KHak mein

KHak-e-gulshan ab gul-e-tar ban ke itrai to kya

miT chuke jab walihana bankpan ke walwale

aai ab doshiza-e-mausam ko angDai to kya

khul chuka jab parcham-e-gham zindagi ke qasr par

ab hawaon ne kamar paudon ki lachkai to kya

aansuon mein bah gain jab KHun ki jaulaniyan

jangalon ki chhanw mein barsat iThlai to kya

'josh' ke pahlu mein jab tum hi machal sakte nahin

phir ghaTa ke damanon mein barq lahrai to kya

(536) Peoples Rate This

Your Thoughts and Comments

GhaTa Chhai To Kya In English By Famous Poet Josh Malihabadi. GhaTa Chhai To Kya is written by Josh Malihabadi. Read famous Poem GhaTa Chhai To Kya for youth and Student by Josh Malihabadi. Free Download GhaTa Chhai To Kya in PDF.