Hum Ko Diwana Jaan Ke Kya Kya Zulm Na Dhaya Logon Ne

hum ko diwana jaan ke kya kya zulm na Dhaya logon ne

din chhuDaya dharm chhuDaya des chhuDaya logon ne

teri gali mein aa nikle the dosh hamara itna tha

patthar mare tohmat bandhi aib lagaya logon ne

teri laTon mein so lete the be-ghar aashiq be-ghar log

buDhe bargad aaj tujhe bhi kaT giraya logon ne

nur-e-sahar ne nikhat-e-gul ne rang-e-shafaq ne kah di baat

kitna kitna meri zaban par qufl lagaya logon ne

'mir-taqi' ke rang ka ghaza ru-e-ghazal par aa na saka

'kaif' hamare 'mir-taqi' ka rang uDaya logon ne