Karachi Ke Mushaere Mein Daka

ye kis ne bazm-e-adab ke sukun ko taka

mushaeron mein bhi paDne laga hai ab Daka

mushaere mein Dakaiti ka shauq rakhte hain

hamare ahd ke Daku bhi zauq rakhte hain

adab-nawaz the Daku suKHan-shanas the wo

mere watan ki siyasat ka iqtibas the wo

ajab Dakait the jin ka nasib phuTa tha

jinhon ne shahr ke in muflison ko luTa tha

paDa wo ran ki ek ustad sher bhul gaya

kisi nahif se shaer ka sans phul gaya

bayaz apni kisi ne uchhaal kar rakh di

bajae cash rubai nikal kar rakh di

udhar Dakait sambhaale the gun uDai hui

udhar wo pel raha tha ghazal churai hui

ye kis ne bazm-e-suKHan luT li KHuda jaane

tamam shahr ne pahne hue hain dastane

mushaere mein na sona tha aur na chandi thi

suKHan-waron ki to har chiz hi purani hai

jo sab se qimti shai hai wo sherwani hai

ye apne sher sunate hi phuT lete hain

mushaere ko tarannum se luT lete hain

hamare sher sunen aur sher-bin ho jaen

KHuda kare ki ye Daku bhi samain ho jaen