Meri TaKHliq Hui Jis Ki Tag-o-taz Ke Sath

meri taKHliq hui jis ki tag-o-taz ke sath

wahi zarra mujhe takta hai baDe naz ke sath

jurm ke baad khula dil pe dar-e-KHauf-e-saza

zehan bedar hua subah ke aaghaz ke sath

main ne bhi toD diya KHak ki KHushbu ka tilism

kho gaya main bhi KHalaon mein baDe raaz ke sath

phir meri rah mein hail hai wahi koh-e-sukut

main ne kaTa tha jise tesha-e-awaz ke sath

DhunDhti phirti hai kirdar ko tamsil-e-gunah

rat-jage KHatm hue 'KHalid'-e-shiraaz ke sath