Hangama-e-hayat Se Jaan-bar Na Ho Saka

hangama-e-hayat se jaan-bar na ho saka

ye dil ajib dil hai ki patthar na ho saka

mera lahu bhi pi ke na duniya jawan hui

qimat mere junun ki mera sar na ho saka

teri gali se chhuT ke na ja-e-aman mili

ab ke to mera ghar bhi mera ghar na ho saka

tere na ho sake to kisi ke na ho sake

ye karobar-e-shauq mukarrar na ho saka

yun ji bahal gaya hai teri yaad se magar

tera KHayal tere barabar na ho saka

guzri jo shab to bujh gae apne charagh bhi

aai sahar to phir koi rahbar na ho saka