Wahshat-e-gham Se Raat Bhar Yaro

wahshat-e-gham se raat bhar yaro

roya main phir hui sahar yaro

jaana chahen bhi to kidhar jaen

kho gae sare rahguzar yaro

zehn-o-dil se nikal kar us ko

kar diya KHud ko mo'atabar yaro

umr bhar gard-e-rah ki surat

main jo karta raha safar yaro

aai KHak-e-watan ki yaad magar

lauT kar phir gae na ghar yaro

hai tamanna nai faza ki magar

kaT gae apne baal-o-par yaro

chahe jitna KHayal rakkho mera

umr meri hai muKHtasar yaro