Raaz-e-dil Jo Teri Mahfil Mein Bhi Ifsha Na Hua
raaz-e-dil jo teri mahfil mein bhi ifsha na hua
ya sar-e-dar hua ya sar-e-mai-KHana hua
ek hum hain ki tasawwur ki tarah sath rahe
ek tu hai ki jo KHalwat mein bhi tanha na hua
kya bharosa hai tere lutf-o-karam ka ai dost
jis tarah saya-e-diwar hua ya na hua
shabnamistan mein utar aai thi suraj ki kiran
aaina-KHana-e-gul tha ki sanam-KHana hua
is qadar ranj sahe dil ne wafa mein 'KHatir'
aaj wo hum se jo bichhDe bhi to sadma na hua
Khatir Ghaznavi 
(368) Peoples Rate This