Tere Dar Se UTh Kar Jidhar Jaun Main
tere dar se uTh kar jidhar jaun main
chalun do qadam aur Thahar jaun main
sambhaale to hun KHud ko tujh bin magar
jo chhu le koi to bikhar jaun main
agar tu KHafa ho to parwa nahin
tera gham KHafa ho to mar jaun main
tabassum ne itna Dasa hai mujhe
kali muskurae to Dar jaun main
mera ghar fasadat mein jal chuka
watan jaun to kis ke ghar jaun main
'KHumar' un se tark-e-talluq baja
magar jite-ji kaise mar jaun main
Khumar Barabankavi 
(591) Peoples Rate This