Ye Kaisa Shahr Hai Main Kis Ajaib-ghar Mein Rahta Hun
ye kaisa shahr hai main kis ajaib-ghar mein rahta hun
main kis ki aankh ka pani hun kis patthar mein rahta hun
wo KHushbu is talluq se bahut bechain si hogi
main kanTa tha magar ek phul ke bistar mein rahta hun
use ek din yahi KHana-badoshi KHud bataegi
main apne ghar mein rahta hun ki us ke ghar mein rahta hun
agar mohlat mile to qatilan-e-shahr se puchhun
main kis ki jaan hun kyun sina-e-KHanjar mein rahta hun
mujhe ye be-panahi kab tera rasta dikhaegi
teri aawaz hun aur gumbad-e-be-dar mein rahta hun
ye sab KHush-posh chehre ho chuke hain munkashif mujh par
main un ke darmiyan kyun jama-e-mahshar mein rahta hun
KHudi kya chiz hai 'KHurshid-akbar' aur KHuda kya hai
kahun main kis zaban se dast-e-ahan-gar mein rahta hun
(327) Peoples Rate This