Din Guzarte Rahe Sanson Mein Thakan Aati Rahi

din guzarte rahe sanson mein thakan aati rahi

dil mein uD uD ke wahi gard-e-mehan aati rahi

thak gae arsa-e-ehsas mein chalte chalte

rah mein hasrat-e-kotahi-e-fan aati rahi

bas dariche se lage baiThe rahe ahl-e-safar

sabza jalta raha aur yaad-e-watan aati rahi

gulshan-e-dahr mein kuchh bu-e-wafa baqi hai

ki KHizan mein bhi saba su-e-chaman aati rahi

phul aaankhon se guzar kar tah-e-dil mein bhi khila

rut bhi badli to wahi bu-e-saman aati rahi

ahl-e-duniya zar-o-gauhar ki tamanna mein rahe

os paDti rahi suraj ki kiran aati rahi

hum kabhi chaak-gareban the kabhi KHak-basar

kar guzarte rahe jo ishq mein ban aati rahi