Ek KHwab

sath agar tum ho to phir hum

hanste hanste chalte chalte

dur aakash ki had tak jaen

kali kali si daldal se

tapta tanba phuT raha ho

makDi ke jale ka fita

kaT ke hum us bagh mein jaen

jis mein koi kabhi na gaya ho

kokanar ke phul khile hon

bhanwre un ko chum rahe hon

patthar se pani chalta ho

main pani ka chullu bhar kar

jab marun chehre pe tumhaare

pahle tum ko sans na aae

aur phir mere sath lipaT kar

aise chhuTe dhaar hansi ki

jaise chashma phuT raha ho