Jab Apne-ap Ko Malbus Mein Chhupaya Tha

jab apne-ap ko malbus mein chhupaya tha

tamam shahr ko hum ne barahana paya tha

na apni subh ki KHushiyan na apni sham ka gham

hamare pas to jo kuchh tha wo paraya tha

talash karti hai jis ko tumhaari rahguzar

wo main nahin tha meri justuju ka saya tha

wo hans raha tha magar ashk-e-gham na rok saka

zara si baat pe jis ne hamein rulaya tha

ajib moD tha tark-e-talluqat ka wo

jab apne-ap se hum ne fareb khaya tha

dhuan dhuan thi faza gard gard tha manzar

dhundlaka sham ka jis din sahar pe chhaya tha