Ragon Mein Zahr Ka Nashtar Chubho Diya Maine

ragon mein zahr ka nashtar chubho diya main ne

na ras aaya jo hansna to ro diya main ne

kahin pe koi mera aks hi nahin milta

kis intishaar mein KHud ko Dubo diya main ne

tum apne KHwab ki aankhon pe hath rakh lena

mata-e-jaan ki tamanna to kho diya main ne

wo roz meri ana ko zalil karta tha

use bhi apne lahu mein Dubo diya main ne

tumhaare nam jo dil ke waraq pe raushan tha

wo ek harf-e-aqidat bhi dho diya main ne