BichhaD Ke Tujhse Na Jite Hain Aur Na Marte Hain
bichhaD ke tujh se na jite hain aur na marte hain
ajib tarah ke bas hadse guzarte hain
zamin chhoD na paunga intizar ye hai
wo aasman se dharti pe kab utarte hain
ye kis ne khinch di sanson ki laxman-rekha
ki jism jalta hai bahar jo panw dharte hain
ye chand tare zamin aur aaftab tamam
tawaf karte hain kis ka tawaf karte hain?
hayat deti hain sansen bas ek maqam talak
phir is ke baad to bas sans sans marte hain
Krishn Bihari Noor 
(376) Peoples Rate This