Jis Ka Koi Bhi Nahin Us Ka KHuda Hai Yaro
jis ka koi bhi nahin us ka KHuda hai yaro
main nahin kahta kitabon mein likha hai yaro
muD ke dekhun to kidhar aur sada dun to kise
mere mazi ne mujhe chhoD diya hai yaro
is saza se to mera ji hi nahin bharta hai
zindagi kaise gunahon ki saza hai yaro
shab hai is waqt koi ghar na khula paoge
aao mai-KHane ka darwaza khula hai yaro
koi karta hai duaen to ye jal jata hai
mera jiwan kisi mandir ka diya hai yaro
main andhere mein rahun ya main ujale mein rahun
aisa lagta hai koi dekh raha hai yaro
haal ka zaKHm to mazi se bahut gahra hai
aaj zaKHmi mera saya bhi hua hai yaro
intizar aaj ke din ka tha baDi muddat se
aaj us ne mujhe diwana kaha hai yaro
Krishn Bihari Noor 
(612) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544